समाज

गृहपृष्ठ
समाज
हुम्लामा पहिलोपटक बालविवाह खारेज

हुम्लामा पहिलोपटक बालविवाह खारेज

आइतबार, असार ८, २०८२ मिडिया जर्नल

काठमाडौँ । हुम्ला (अदानचुली )जिल्लामा उमेर नपुगी गरिएको एक बालविवाह बदर भएको छ । जिल्लाको सिमकोट गाउँपालिका–२ का १५ वर्षीय युवक र खार्पुनाथ गाउँपालिका–२ की १४ वर्षीया बालिकासँग हालै गरिएको बिवाह बदर भएको हो ।

उमेर नपुगी बालविवाह गर्ने बालबालिकाहरू खार्पुनाथ गाउँपालिका–२ की १४ वर्षीया अस्मीता रावल र सिमकोट गाउँपालिका–२ का १५ वर्षीय भुपेन्द्र भण्डारी रहेका छन् । उनीहरू दुबै जना विद्यालयमा अध्ययनरत छन् ।

बालविवाह भएको जानकारी प्राप्त भएपछि सिमकोट र खार्पुनाथ गाउँपालिकाको समन्वयमा अभिभावकहरूको उपस्थितिमा खार्पुनाथ गाउँपालिकाका अध्यक्ष कर्णबहादुर रावलको रोहोवरमा बालविवाह बदर गरी बालबालिकालाई सम्झाई अब २० वर्ष पूरा भएपछि मात्र विवाह गर्ने सर्तमा हाललाई आ–आफ्नो घर फर्काउने सहमति भएको अध्यक्ष रावलले बताउनुभयो ।

शुक्रबार अपराह्न दुबै जनालाई अभिभावकको जिम्मा लगाउँदै घर पठाइएको हो । साथै पालिकामा भएको सहमति अनुसार नभएमा प्रचलित कानुन अनुसार कारबाही प्रक्रिया अगाडि बढाइने चेतावनी समेत दिएको छ । बालविवाह रोकथामका लागि खार्पुनाथ गाउँपालिकाले गरिएको यो प्रयासले जिल्लामा सचेतना र कानुन कार्यान्वयन दुवै पक्ष सशक्त रुपमा अगाडि बढिरहेको सङ्केत दिएको छ ।

जिल्लामा पछिल्ला वर्षमा सानै उमेरमा छोरीको विवाह गरे पुण्य प्राप्त हुन्छ भन्दै बालविवाह गर्ने चलन अझै कायमै रहेका कारण बालविवाहले प्रश्रय पाएको स्थानीयवासीको भनाइ छ । पुण्यका नाममा जिल्लामा बालविवाह बढ्न थालेपछि यहाँका स्थानीय तहले बालविवाह अन्त्य गर्ने भन्दै रणनीतिक योजना तयार गरी लागू गरेको भए पनि उक्त योजना यहाँका गाउँघरमा लागू हुन सकेको छैन।

बालविवाह गर्नेलाई कानुनी दायमा ल्याउन नसकेका कारण बालविवाह जस्ताको तस्तै अवस्थामा रहेको सामाजिक क्षेत्रमा काम गर्दै आएका विभिन्न सङ्घ संस्थाको बुझाइ छ ।

प्रकाशित मिति: आइतबार, असार ८, २०८२ १०:५९

प्रतिक्रिया दिनुहोस्