राजनीति

गृहपृष्ठ
राजनीति
ललितपुर महानगरमा युवालाई रोजगारीसँग जोड्ने दीर्घकालीन नीतिगत व्यवस्था गर्न सुझाव

ललितपुर महानगरमा युवालाई रोजगारीसँग जोड्ने दीर्घकालीन नीतिगत व्यवस्था गर्न सुझाव

सोमबार, जेठ २७, २०८२ मिडिया जर्नल

ललितपुर । ललितपुर महानगरको आगामी नीति तथा कार्यक्रम तर्जुमा सन्दर्भमा संघीय सांसद र प्रदेशसभा सदस्यले युवालाई रोजगारीसँग जोड्ने दीर्घकालीन नीतिगत व्यवस्था गर्न सुझाव दिएका छन् ।

छलफलमा सांसद उदयशम्शेर राणाले सडक व्यवस्थापनमा ध्यान दिन र चक्रपथ क्षेत्रमा फ्लाइओभर तथा अन्डरपास निर्माणको प्रस्ताव राख्न आग्रह गरे । सांसद प्रेमबहादुर महर्जनले हस्तकला प्रवर्द्धन, सामुदायिक विद्यालयको सुधार र फोहोर व्यवस्थापनमा जोड दिनु पर्ने बताए ।

राप्रपाका सांसद रोशन कार्कीले सार्वजनिक जग्गाको संरक्षण र पर्यटन प्रवर्द्धनमा ध्यान दिन आग्रह गरे । प्रदेशसभा सदस्य रघुनाथ महर्जनले प्रदूषण न्यूनीकरण, हाट बजार व्यवस्थापन र खोलानालाको सरसफाइका लागि नीतिगत सम्बोधन गर्नुपर्ने बताए ।

महानगर प्रमुख चिरीबाबु महर्जनले सुझावलाई समेटेर नीति निर्माण गरिने बताए । प्रमुख प्रशासकीय अधिकृत रेखादास श्रेष्ठले ८९ प्रतिशत योजना कार्यान्वयन भएको उल्लेख गर्दै आगामी वर्षको नीति अझ प्रभावकारी बनाइने जानकारी दिए ।

प्रकाशित मिति: सोमबार, जेठ २७, २०८२ १३:०७